[align=center][/align]





[align=center]السلام عليكم ..

مساكم الله بالخير والسرور .. حبيت اسرد لكم هالسالفه .. قبل مباراة الهلال والاتحاد .. عسى الله يكتب الفوز للهلال اليوم .. ويزيد افراحه افراح ..

المهتمين بالشعر الشعبي .. لابد وان سمعوا القصيدة المعروفه .. لي بنت عم ماوطت درب الادناس .. وان لم يسمعوها كقصيده .. فأكيد سمعوها كاغنيه من راشد الماجد غناها منذوو مبطي ..

هالقصيده ابطالها الشاعر .. شرعان بن رمال الشمري .. وبنت عمه .. والقصيده تحمل الكثير من كلمات الحب والوله والشوق .. وسرد القصه له فايده وحكمه ..

السالفه ياطويلين العمر .. ان بنت عم شرعان .. بنت جميله ومزيونه .. ويضرب بها المثل في زينها بين ابناء القبيله .. و ولد عمها شرعان .. مجنون بحبها لدرجة كبيره .. ويبيها حليلة له وام لعياله .. وهي بنفس الوقت تبيه .. وتحبه .. وتبادله نفس الشعور والحب ..

بالفعل تقدم شرعان لعمه طالب يد بنته .. ووافق عم شرعان على الزواج .. طبعا بعد ما اخذ راي البنت .. لان الامر يرجع لها اولا واخيرا .. وبيدها هي لوحدها الحل والربط .. وتم الزواج بين شرعان وبنت عمه .. وعاشوا فتره مبسوطين سعيدين .. هو يشيلها بعيونه .. وهي ماترفض له طلب .. وتصونه وتصون حبه لها ..

المهم يا وجيه الخير .. اتفقت زوجة شرعان انها تورد هي وخمس من بنات للبير .. يجيبون الماء لبيوتهم .. لان البدو اول كان ما يجيب الماء الا بناتهم .. ويستخدمون هالماء في الطبخ والغسيل والشرب واحتياجاتهم اليومية .. وصلوا البنات للبير.. وكل وحده حامله معها قربتها .. وقعدوا يسولفون ويضحكون .. ويحشون (البنات هذا طبعهم من يوم يومهم) ..

وفجأه طب عليهم قاطع طريق وهم عند البير .. رجال أقشر شايل معه بندقيته .. وحزامه متوسط بها شبريه .. و قام يهددهم ويتوعدهم .. البنات ارتعبوا وخافوا .. وكل وحده قامت تولول وتعلي صوتها .. يمكن احد يسمعهم .. اللي تقول يا زوجي .. واللي تقول يابووي .. والللي تنادي يا فلان .. المهم .. ما طلع في المحاولات فايده .. وسكتوا وهديوا بعد ما هددهم قاطع الطريق بالقتل ..

يوم سكتوا البنات .. قرب لهم قاطع الطريق الخايس .. وقال لهم : يالبنات .. والله ثم والله .. اللي ما تخليني الحين ابوسها .. قسم بالله غير اقطع قربتها .. اول البدو كانوا في فقر شديد .. والقربه كانت تسوى لها ثمن مو هين .. قاموا اتفقوا البنات بين بعضهم انهم يسمحون له يبوسهم .. علشان يفتكون من شره .. ويضمنون قربهم ..

وبالفعل .. جا قاطع الطريق وقبل كل بنت من البنات الخمسه .. الا زوجة شرعان الشمري .. رفضت انها تسمح له يقبلها .. وتمنعت شديد التمنع .. فقام الخايس وشق قربتها .. وترك البنات وراح ..

المهم .. يوم رجعوا لديارهم .. بقية البنات خافوا من الفضيحه .. وقالوا الحين زوجة شرعان تروح تعلمه .. ويقوم هو ويفضحنا بين ازواجنا وابائنا .. فاتفقوا بين بعض .. انهم ينشرون شائعه يقولون فيها ان زوجة شرعان خلت قاطع الطريق الخايس يتمكن منها .. وينول منها اللي يبيه .. وانتشرت هالشائعه بين ابناء القبيله .. وصارت هالسيره على كل لسان ..

شرعان بدوره .. انصدم يوم سمع الخبر .. وراح وكلم زوجته يستفسر منها عن الصحيح والصدق .. وقالت له وش صار بالضبط .. لكن كثرة الكلام من ابناء القبيله .. ونظرتهم له .. ما ريحته ابدا .. وخلته ما يصدق كلام زوجته .. ونتيجة هالحاله .. والوسواس .. قام وطلقها طلقه صغرى .. ووداها لبيت اهلها ..

المهم يا طويلين العمر .. مرت على هالحاله ثلاث شهور .. الا ان جا يوم .. وجا للقبيله رجال غريب .. ودخل بيت عم شرعان .. وقاله له : يا شيخ .. انا فلان ابن فلان وجايكم لاجل اعترف بغلطتي بحق بناتكم ذاك اليوم .. وابين لكم القصه الصحيحه .. لاني والله حاس بالذنب وابي منكم العفو والسموحه ..
وقال لهم السالفه من طق طق .. للسلام عليكم .. وانصدم شرعان مره ثانيه .. وندم اشد الندم انه ما صدق زوجته يوم قالت له السالفه .. وعزٌم اليوم الثاني انه يروح لعمه علشان يرد زوجته وتتصافى النفوس ..

اليوم الثاني راح لعمه .. ودخل عليه .. وطلب منه انه يرد له زوجته .. وتأسف شديد الاسف على موقفه المتسرع .. وظلمه لبنت عمه وزوجته .. لكن عمه صعب عليه انه يردها بعد ما سوى فيها هالسوايا .. وجارى كلام الناس .. و باع سمعة عمه وبنت عمه بوسط القبيله .. قام طلع شاعرنا مقهور ومتنكد ..
وقال هالقصيده يبين حالته .. والبيتين اللي بالاحمر .. هي اشهر بيتين بهالقصيده ..


ياراكب ثنتين يشدن الاقواس **** من دار ريضان الحجر حركني

مافوقهن كود الدويرع وجلاس **** وسفايف بين اربع يلعبني

تحركنا من عندنا حين الامراس **** ومضى سواد الليل مابركني

حكن علم عذفا يسارن من الرأس **** والظهر مع ورد الحفر يشربني

وحطو لهم مع هقلة الحضر بلاس **** عن الحضر واللي بالخلا يسرحني

وليا لفيتوا عند مدقوق الالعاس **** الجادل اللي بالمحبه محني

قولوا على حبل الرجا نطوي الياس **** ولبيض غيره كلهن يحرمني

ولو يندوي جرحي دويته بزفواس **** ولا بني رفاف البيت منكم ومني

والله يعلم بالخفايا والآجاس ***حيث مضى من صغر سنك وسني

وياعم اللي طعت بي هرج الانجاس *** طاوعت هرج الناس واخلفت ظني

طعت بي ياعم دايس ودرباس *** وعوارض صدقتها وابعدني

ومن لااخذ من درس الاسلاف نبراس **** تمضي حياته بالرجا والتمني

واقفيت ادير بظامري كل هوجاس *** على وليف بالحشا غاب عني

تكبي خواطرهم ليا جيت عساس **** ولاتقل انا منهم ولاهمب مني

ومريت دار ماتقل جنة الاوناس **** وونيت ودموع العيون ذرفني

جيت المراح اللي بالعشب محتاس **** العشب في مضرب وسادة معني

محذا شبة الناس ومشتاقة الراس *** وثلاث لايبكن ولاينبكني

لي بنت عم ماوطت درب الادناس **** ولادنست يوم النساء يدنسني

ضربتها وانا احسب الضرب نوماس **** طلقتها يوم افخت العقل مني

ياناس كيف العين تبكي على ناس *** وكيف العيون بلا رمد يسهرني

لو ينشكي حبي على ذيب لاخماس *** يسرح مع الطليان مايجفلني

ولو ينشكي حبي على طير قرناس *** اضحى الضحى بمويكره مستكني

ولو ينشكي حبي على قب الافراس **** عين نهار الكون لايفزعني

ولو ينشكي حبي على الميت ماناس **** يثور من بين النصايب يوني

ولو البيوت مشددينه بالامراس **** عين مع الخفرات لاينبنني

وحتى النجوم اللي مع الليل غلاس **** لو ينشكي حبه لهن وقفني

ولو ان غوطة (دم سلمان ) واضراس **** يدرن بماقلبي لقلبه يكني

تلقى سهل جبة هضاب ومنحاس **** وحتى الجبل بالقاع صار متثني

اشرفت رأس ضراس من فوق الاطعاس **** ولالوم طراد الهوى لو يجني

هليت دمع العين واوميت بالراس **** ورافقت كور العيس ياما ابعدني

ورفعت نفسي عن شبا كل وسواس **** البعد احلى من حياة التمني

انا زبون الحرد للخيل مدباس **** ياكلشن شهب الشوارب نخني

نفسي تشوم عن التدلبح مع الساس **** ولاعاش من هو عن رفيقه يكني

من شيدوا (زينة ) على غيد واغراس **** ليا نسيت رسومهم ذكرني

ياعم انا لي طلبة الراس بالراس *** ياعم شوف رسومهم ماانمحني

ولو صرت ان القلاع ماشلت الاضراس ***** والموس مايقطع بليا مسني

ياصار ماربعن على الرائ جلاس **** وجنحان طير السعد يلفحني

نصير دوم للصقاقير مدواس ***** مثل اللي يسمع صفير المغني

والله يلولا بكرة يبووناس **** حبه سكن باقصى الضماير محني

والله لو هي ماتبيني فلا باس **** لاشك خبثان النفوس طردني

وانا احمد اللي خالق كل الانفاس **** وجعل وساع القاع مافيه مني

دار بدار ولامناخات الانجاس **** ياصار مايمناك عينك تزني

في بلدة الغراف من جملة الناس ***** ولا نيب من يرجي الخلايق تحني

دار به الاكرام والطيب به ساس **** دايم تذكرني ليال مضني



وبعد ما سمع عمه هالقصيدة .. عطف عليه وحزن .. وحاس بألمه وندمه على اللي سواه .. فقرر انه يرجع له زوجته .. وبالفعل رجعت له زوجته .. وعاشوا بعدها في صفاء وحب طول عمرهم ..


اللي نستفيده يا طويلين العمر من هالسالفه .. اننا لانتسرع باتخاذ القرارات على اي خبر يجينا من مصادر غير موثوقه .. ولابد نتثبت من هالخبر ونستعلم .. علشان لانبني قرارات مغلوطه .. وينتج عن هالقرارات ظلم لاناس نحبهم ونغليهم ..

دمتم بخير ،، ويارب الفوز اليوم للهلال ..



..[/align]