السلام عليكم ورحمة الله وبركاته
لقاء اليوم مع الغالية حبيبة أبوهـا
**********************
1- متى بدأت الصيام ؟
اللـه يهديك ما اذكر وش تعشيت أمس ذذ
بس سألت أمي قالت يمكن في رابع .
2- كيف كان صيام طفولتك ؟
صيام الديك و الدجاجه
بصراحه أنا ما أحب أصوم استغفر اللـه ..
مو كله حب في الأكل , بس من يومي ما أتحمل ! أهم شي عندي الفطور
إلى الآن .. يجي يوم كااامل ما آكل شي أببد عاادي بس أكون أفطرت وأتقهوى وأشياء خفيفه مرره ,
بس الفطور ما أقدر هي وجبتي الرئيسية ..
يعني بعد ما أفطر عادي أصوم إلى الفجر
3- موقف طريف حدث لك في رمضان ؟
خفيف .. ما أذكر , غيره .. خليها مستوره
أكره المواقف الغبيه ودائماً أطيح فيها !
4- أذكر لنا نظامك مبسطاً في رمضان ؟
رمضان العام وكل عام يختلف عن رمضان هالسنه بـ 180 درجـه !
بس من كان همه الدين يسر اللـه أمره ومن كان همه الدنيا وأشغالها أشغله ربي بـ همه !
اللـه لا يشغلنا عن طاعته ..
اممم الفتره هذي وأتوقع بعد تاريخ 10 بيتغير هالنظام ..
أقوم من النوم وقت صلاة العصر > بدري =/
أصلي وأرتب وأنزل تحت عند أمي تكون العصر بالمطبخ , طبعاً نشتغل معها إلى وقت الأذان
نفطر بعدين نرتب ونحط العشاء وبعد العشاء كلٍ ينشغل بنفسه
أقعد أنا وأمي وأختي القميله فقط > إذا خواتي مو موجودين
نتقهوى ونسولف إلى وقت التراويح .. بعدها نروح نصلي
وأحلللى شي في المسجد .. نصلي وأشوف بنات خوالي وصديقاتي وصديقات جدتي ياحبي لهم ( بس جدتي ماجت رمضان هالسنه ),
بعدين على الساعه 10 أفتح النتأو أحوس هنا وإلأ هناك أو نروح سوق ,
إلى الساعه 3 ننزل نجهز السحور وبعد السحور يروحون ينامون
إلا أنا وأختي ندخل الغرفه ونسولف إلى الساعه سبعه > فضحتي نفسك ياويلك
5- مخططاتك في الشهر الفضيل ؟
كنت .. لاااحظي كنت
ناويه أختم القرآن ( بإذن اللـه بيصير ) وماا أترك صلاة التراويح أبببد ( وتركتها كم مره )
وناويه أدخل نادي مع أختي يعني سعة صدر > بس ما قصر بيتنا نادي ببلاش
وناويه أخلص ملابس العيد قبل العشر الآواخر لأنها تشغل وأشيااء كثييييير براسي ولا سويتها
لكن .. أنا أريد وأنت تريد واللـه يفعل ما يريد ,
نقول اللـه يبارك بالأيام الجايه ..
6- هل تحافظ على صلاة التراويح والقيام ؟
أتـمنــى .. بس مع الأسف مو كل يوم
7- هل أنت من متابعين التلفاز برمضان بشغف ؟
لا الحمد للـه .. كارهه التلفزيون
ما أشوف إلا بعض البرامج وبدون متابعه , وأحياناً أشوف توم وجيري مع حمد
8- برأيك كيف نستطيع أن نستثمر وقتنا في رمضان مع كثرة مغريات الحياة ؟
إذا الواحد ينشغل أفضل طريقة إنه يكتب كل اللي يبي قبل رمضان ..
يكتب الأعمال اللي يبي يسويها مثل : صلاة تراويح , أختم قرآن عالأقل مره , أصلي , أطعم , أتصدق و ....
> عشان يشوف بعد رمضان هل هو استغله أو لا !
ويكتب الأشغال اللي لازم يسويها مثل : أغراض العيد وغيره , عشان يرتب نفسه
و أهم شي العزيمه وربك يوفق ويعين
9- أكلتك المفضلة في رمضان ؟ " مع وصفها بشكل مبسّط "
الأكله اللي تقريباً يوميا ً ( شوربه ) وأذكر كتبت الوصفه ,
الناس أذواق وأحس إذا تعودت على شي أساسي ما راح يعجبني غيره حتى لو سويته ..
< قولي ما فيني أكتب الوصفه ولا تتفلسفين
وعموماً .. آآخر اهتماماتي الأكـل
10- فطورك كيف تفضله ؟
عادة تعودنا عليها ..
أول شي ( تمر وقشطه أو دخن ) و الحلويات مع القهوه والعصير
بعدين نقوم نصلي المغرب وبعد الصلاة نحط الشوربه والأكـل اللي مسوينه معها ..
وبس =)
11- عادات لا تتخلون عنها في رمضان ؟
نلف سمبوسه وأصابع
> من جد مدري ليه كل الناس موقتينها برمضان وكأنه شهر الأكل !
بس حنا عكس الناس , بالأيام العاديه وقت القهوه ( المغرب ) ونجتمع عليها ..
حتى صديقاتي تعودوا ما أحد يكلمني وقت المغرب
وأذكر وحده قالت لي : إذا صار المغرب أتخيلك قاعده تتقهوين
أما برمضان وقت المغرب لأ ما نجتمع بالعكس بعد الفطور كل واحد يروح للي يبي .
اممم يعني ما اذكر فيه عادة محددة > هاتي من الآخر ذذ
12 - أخيراً .. نصيحة تقدمها لكل صائم
أقدمها لنفسي ولكل مسلم ..
اسستغلوا رمضان ؛ لأن الأجر مضااااعف .. استغله بأي شيء لو بابتسامه
قراءة القرآن أهممم شي , واحتسبوا الأجر بكل حركه حتى بشرب المويه !
و صلاة التراويح والقيام , شهر واحد بس لااا يضيع , فيه حديث أعتقد الكل يعرفه
قال صلى الله عليه وسلم"رغم انف امرئ ثم رغم انف امرئ ثم رغم انف امرئ"
قال الصحابة : خاب وخسر يا رسول الله ! من هو؟ قال : "من أدرك رمضان ولم يغفر له" !
تخيلوا إن الرسول دعا عليه .. تعتقدون إن الدعوة يمكن ترد ؟
والبنات .. إذا رحتوا السوق , حاولوا تتسترون قدرر الإمكان ولا تكونين سبب لفتنة شخص
وتصدقي لعمال النظافه وغضي البصر ولااا تشترين ما يغضب ربك لأن الدنيا فانيه ..
والرجال .. أعتقد الأمور مسهلة لهم أكثر , تقدر تتصدق وتفطّر صائم تشتري بأي مبلغ وتعطيه المساجد أو الخيام لإفطار صائم ,
ولا يكون شغلكم الشاغل الأكل , بسكم عاد
أسأل اللـه العظيم أن يبارك بأيامنا في رمضان ويجعلنا من المغفور لهم ..
ويعيده علينا وعليكم أعواام ونشوفكم هنا بالدرر كلكم بصحة وسلامـة
أعتذر .. طولت والكلام مو مرتب .. بس ان شاء اللـه يوصل
********
ألف شكر لك حبيبة خانوم