يوم في حياة درري

[ام سلمان]

 

مرحبا بكم اخوتي واخواتي في درتكم الاسلامية التي لبست اليوم ثوب جديد في اطار'صيفكم احلى مع الدرر" وتحت لواء قول نبينا"يا حنظلة ، ساعة وساعة ،"

نرحب بكم في منوعة يوم في حياة درري
يوم في حياة اعضاء نحبهم نحترمهم...نستمتع بمواضيعهم...نتابع اخبارهم
منهم من نعتبرهم اب اخ اخت صديق او صديقة..نقضي معهم احلى الاوقات واليوم سنقضي معهم يوم كامل
ارجو ان تستمتعوا معنا وان تشاركوونا


كلمة العمدة اسال الله له الجنة

يوم في حياة درري
السلام عليكم ورحمة الله وبركاته
يومي وعن أي يوم أتحدث ؟
هل هو يومي الحالي بعد التقاعد أم يومي قبل التقاعد ؟
على كل حال يومي قبل التقاعد ولى بخيره وشره والحمد لله على كل حال
أما يومي الجديد بعد التقاعد فهو لم يستقر على رتم معين حتى الآن
فقط أحتاج لوقت من الراحة حتى أرتب هذا اليوم
لذا أمل من الجميع التماس العذر لي
فما مشاركتي هذه إلا دعماً وتشجيعاً للغالية أم سلمان وتسجيل حضور فقط
لكنني أتمنى من جميع من وصلتهم رسالة تطلب المشاركة ألا يخيب ضننا فيه
وأمل أن أرى تفاعلاً كبيراً مع هذا البرنامج الصيفي
تمنياتي للجميع بدوام التوفيق والنجاح
وللجميع خالص تحياتي

[ام سلمان]

 

يوم سنقضيه مع طبيبتنا الغالية التي نفتقدها في الدرر والتي نسال الله ان يحفظها وان يوفقها

دانيا

الســلام عليكم يا دريين ..

وحشتوني كلكم ..
ووحشتني الدرر ,

الحمدلله اننــي قررت أنظم يومي , لكني حأكتب حاليا عن يومي العادي قبل التنظيم ..

سبت و أحد اجازة

و

باقي الأيام دوام من الساعه 9 صباحا - 4 ونص ظهراً ..
الجمعه الى 2 ونص .. ظهراً,

التوقيت عندي +14 ساعه على توقيتكم .. واذا عندكم ليل انا عندي نهار والعكس, غير كدا انتو قبلي في اليوم .. اذا عندكم جمعه الليل انا عندي صبح الجمعه , وهكذا .....

نبدأ بسم الله ,

حأشرحلكم أول يوم في الإسبوع الي هو يوم الإثنين :

أصحى الساعه 7 ونص صباحا .. أحل الواجبات + اجلس عالنت شوية + أفطر .. وهذا يحصل نادراً, غالبــا و أنا رايحة للمعهد أعدي على Tim Hortons أو ستار بكس, أخدلي هوت شوكلت او كاراميل لا تيه مع بنانا شيبس كيك أو دونات صغير كور , ..

أروح المعهد .. وشنطتي على ظهري رجعت لأيام الثنوية ,
وأدخل الكلاس هااااي قود مورنينق ,
وتبدا الكلاسات.. المسافة من بيتي للمعهد تقريباً دقيقتين مشي,
بس احيانا الدقايق تطول اذا لقيت كلب في الأصنصير ماأرضى اطلع معاه أستناه ينزل وارجع اضغط الأصنصير..


.
ينتهي الدوام الساعه 3 لكن الطلاب السعوديين عندنا أكسترا كلاس.. رايتنق أو university workshop
أخرج من المعهد ع الساعه 4 ونص ظهراً ..

بريك الغدا من الساعه 12 ونص - 1 ونص } مشتركة مع مطعم عربي يجبلي الغدا اليين المعهد .. الحمدلله

بعد كدا أرجع البيت ..أجلس ع النت شويتين, أو أطلع مع صحباتي.. اذا عندي اختبار ازاكر واذا ماعندي أناااااااااااام اليين الفجر
المغرب عندنا يأذن الساعه 9 ونص م والعشا 11 م و الفجر 3 ونص ..
فأصحى انا ع الساعه 4 او 5 أحل واجباتي اذا ماعندي شي أكمل نووووم ..

الويك أند , أصحى من الساعه 8 ص , أكلم أهلي بالنت
و أنظف البيت و أغسل الملابس واستحم و أخرج مع صحباتي ..

أو اني أروح المكتبة العامة و أستعير كتب لتعليم اللغة ..

نروح البحر داايمااا.. مطاعم حدايق قهوات - نتمشى في الربسون ستريت .. } زي التحلية تحت بيتي..

خلص يومي الحالي. لكن ايام الجاية حتكون غير ان شالله..
شدة حيل وتغير معهد ان شالله و ووصوول اخويا بالسلامة بعد 3 اسابيع

.
في الأمس كان اليوم الوطني الكندي ,,
أحلى يوم في حياتي كان . عشت جو مرة حلو ..

الألعاب النارية الي عملوها
http://www.youtube.com/watch?v=T5GVQ9d3sGw
فضلا اعملو الصوت سايلنت..

صورة عن يومي أمس.. 1 جولاي,



و سلامتتتتكم يا الدررين

[همس الورد]

 

دانيا
لو سمحتي لاتغلطي مافي زي تحلية جده ...
ماشالله عليكي يومك كله دراسه والدراية بالنسبه لك اهم من المتعه الله ينجحك ويوفقك وان شالله ترجعي بالشهادة الحلوه
من جد لك وحشة يابطه

همس الورد

[ايفا مون]

 

[size="5"]استمتعت بقراءة يوميات الضيوف


الفاضل \ابو فهد

لعل التقاعد بداية انطلاقة لا كما يقول البعض سويت واديت اللي علي


وجاء وقت الراحة بالعكس بداية استخراج الطاقات اللي كانت مغمورة بسبب العمل


وارتباطات العمل

موفــــــــــق اخي الفاضل



___________________

الغالية \ دانيا

والله البنت فالتها اشوف اتمنى لك التوفيق من اعماقي


ويوصل اخوك بالسلامة وترجعوا سالمين غانمين

^_^

___________________

[color="rgb(105, 105, 105)"]أم سلمان الغالية [/color]

مجهود تشكري عليه وعندي اقتراح

" مش افضل لا صار لكل ضيف صفحة مستقلة "

والله يعطيك العافية

^_^

موفقة [/size]

[*amula_beauty*]

 

يا عيني يا عيني


دنوووو هنا ^_^


وحشتيني يا شريره


كلنا اشرار انا وانتي لأننا مو قادرين نتواصل من بعد كندا


يا عيني عليكي ,, يومك حااافل وفل


اكتر شي عجبني ( ستاربكس )


شهيتيني يابت ^_^


يسعدك ربي ياقمر



وشكرآ للغاليه / ام سلمان لأنها اتاحتلنا فرصة نشوف ( يوم في حياة دنو )

[*amula_beauty*]

 

عـــُدنــا /


اكتشفت انو العمده قال كلمه وما انتبهت لها ^_^


الله يسعدك ياعمده ... شوفلنا يوم كاشت فيه ...

ودعملنا اياه بالصور

[ام سلمان]

 

يومنا سنقضيه مع الحبيبة الغالية الامورة

amula

اوصيكم بان تشدوا الاحزمة








يوم في حياتي ...

والله احترت ايش اكتب وعن ايه اكتب ,, بس حبيت ارد بأسرع وقت عشان ما تتضايق حبيبتي ( ام سلمان ) ,,

لأني شريره ضايقتها قبل كدا ;) <<كان ممكن استنى يوم تاني بس ما حبيت اتأخر
كان امس يوم عادي تقريبآ في حياتي ..

قمت الصباح الساعه 8 ونص واول ما صحيت وفتحت عيوني الحلوه, الله يخليلي اياها << مع نفسي

قعدت ادور على حشرتي الحبيبه ( ladybird ) ادورها يمين شمال فوق تحت ,, ما لقيتها


خفت تكون ماتت ولا نمت عليها فجأه ...
لأني مو فاكره ليلتها رجعتها لمكانها ولا نمت بينما انا العب معاها

بعدين صحصحت وافتكرت انها ماتت واني لسا احلم ... انقلب مودي طبعآ

غيرت ملابسي واتأنتكت ورحت للكلية كان عندي شغله بسيطه خلصتها وطلعت



وبعدين رحت للأحوال عشان اصير سعوديه << يا شيخه

قصدي عشان اطلع بطاقة احوال

وخلصت ع الساعه 12 تقريبآ ...


رحت واخدت ماما من مدرستها واخدت اختي ( ظل القمر" ) من المدرسة كمان وع البيت دوووغري





وصلت البيت جاني اتصال من ابو راكان الله يهديه ,, اتخاصمنا شويه وقفلنا << عادي يعني

هههههههههههههههههه

وبعدها رحت لماما وقلتلها يا ماما يا حبيبتي يلا نسوي ( مرقوق ) ونروح لأمي << امي= جدتي ام بابا بس اناديها ( امي )
وسوينا مرقوق لزززززيز ورحنا لجدتي العصريه واتغدينا سوى ...


بعدها رجعنا البيت انا وماما ولبسنا ورحنا للمركز ( مركز تطوعي ) احنا مأسسينه مع داعيات و تربويات في المدينه

وانا المنسقه للبرامج ... اجتمعنا واتفقنا وكتبنا التوصيات وارسلناها للدكتور ( قسم الرجال) وانتهينا

رجعت البيت ع الساعه 10 وقعدت ارسل تقرير الاجتماع للعضوات ..

ع الساعه 11 خلصت كل شغلي


نزلت اتعشيت ... واتفرجت على مسلسلي الوحيد وجلست مع اهلي

بعدها طلعت غرفتي ع الساعه 2 تقريبآ .. احاول انام يمين يسار ما جاني نوووم

مسكت ورقه وقلم ابغى اكتب اي شي ما نزل عليا الالهام وما كتبت شي

مسكت كتاب وفتحو على اساس اقرأ فيه ... قرأت صفحه بس ويجيني اتصال من ( صديقتي ) بالأردن

طبعآ انا عندي قوانين خاصه ... بعد الساعه 12 ما ارد على اي احد ,, لو يتصل اوباما ما ارد عليه ..

بس صحبتي دي غيييير

طلبت مني ادخل النت محتاجه تتكلم معايا .. وانا احب اسمعلها خصوصآ لما تكون متضايقه ومحتاجتني جنبها



دخلت النت وشغلت المايك وقعدنا نتكلم الين الساعه 4 ...

صليت الفجر ... وطلعت الحوش اطفي اللمبات << حركات مين هدي ؟؟؟

وانا بالحوش لقيت بسه متشعبطه على الشجره حقتنا ,, وبابا الله يهديه معودها دايمآ يحطلها اكل

لما سمعت صوت خطواتي ,,, نطت الأخت بكل اريحيه ... تحسبني بحطلها اكل




انفجعت فجعه معتبررررررره وجريت جري ع البيت ... << ياريتني ما طلعت



طلعت لغرفتي

ونمت اخيرآآآآآآآآآ



وتوته توته خلصت الحدوته


حلوه ولا فتفوووته ؟؟؟


ربي يسعدكم




وشكرآ لأحلى مشرفه .... حبيبتي ( ام سلمان ) ^_^

[/quote]

[عاشق البيت]

 

فتفوووته_ beauty

مازلت تخافى من البسس
يا عروس

[To0ofy]

 

دندونه ياناس على أيامك

وحشتني ايام المعهد تفتكري

لك وحشه يابت

الله يوفقك وييسر امورك

*********
أموله يازين يومك

بس ايش حكاية الحشرة دي حقتك

من جد عندك حشره ...

الله يوفقك في شغلك قولي آميين

*****

عمو عاشق البيت من فتفوته؟؟

معليش حأزعل ياعمو فتفوته دا دلعي التالت

أسأل أموله حتى ايميلي فتفوته

يلا ربي يسعدك ياعمو غير الدلع حق أموله

*********

أم سلمان ربي يسعدك دنيا وآخره

[عاشق البيت]

 

الغالية توووفى
امولة هى اللى قالت فى أخر حركة يومها

وتوته توته خلصت الحدوته

حلوه ولا فتفوووته ؟؟؟
---
على كل حال انت وامولة وبعض الاخوات هنا
من اجمل زهرات الواحة وارق نسائمها
وكلّكنّ فتافيت السكر

[*amula_beauty*]

 

صباحكم سكر ^^

نزل يومي الجميل ,,,

يسعدك ربي يا ام سلمان ....


-----------


صباحك سكر يا عمي ( عاشق البيت )

والله ليك وحشه يا عم الكل

فتفوووته_ beauty

مازلت تخافى من البسس
يا عروس

حلوه هادي دلع جديد .... زي مشاكسه بيتوي اللي زمان

معقوله يعني اتغيير ؟!!!

يسعدك ربي يا عم العرووووس ..



منجد وحشتني ^_^
-----------------------------

موله يازين يومك

بس ايش حكاية الحشرة دي حقتك

من جد عندك حشره ...

الله يوفقك في شغلك قولي آميين

لو يومي عاجبك خديه ياقلبي ... والله انو يوووم كلو كرررف
اكيد يومك احلى لأنك توفي ببساطه ^^

ايوا كان عندي حشره بالربيع ...

بس للأسف عمرها قصير وماتت بعد يومين ..

حزنت حبتين ,, كانت مسليتني تمشي عليا وتلعب معايا << مدري مين يلعب مع التاني

يسعدك ربي يا قمر ...^^


_____


يا عمو عاشق ... منجد ايميلها كلوو فتافيييييت ههههههههههههه

توفي تمزح يا سيد الكل ... ما بيننا شي انا وهيا واحـــــــد ...


^_^

[همس الورد]

 

اموله طلعنا نسخه وحده
نحب افلام الكرتون ونخاف من البسس
كنت استحي اقول اني اخاف من البسه عشان كل ما اقولها يتمصخرو عليا الي معايا

الله يوفقك في شغلك ان شالله وعقبال الدكتوراه يارب

تقبلي مروري
همس الورد

[عمر باعقيل]

 

اموله
فكرتيني بموقف صار ليا في المكتب قبل 3 سنوات دخلت قطه المكتب وماشفتها وبعد ساعة تقريبا اكتشفت انوا في المكتب توجد قطه وانا ماحبهم مره الموهم ارتعبت منها وجلست فوق الطاولة وهيا تتفرج عليا وابغى اروح البيت مو قادر بسبها لمن ماجتني فكره رحت اتصلت على البنغالي الي عندنا بالمكتب وقلت له الحقني اخوان جاء مشمر يده على باله مضاربه لمن قلت له ابعد البسه قام يضحك وبعد جهد جهيد راحت البسه وانا رجعتي بيتي

اموله
ربي يجعل ايامك كلها سعادة
وسامحيني على الاطاله

[عاشق البيت]

 

حتى انت يا اسير البسس

[*amula_beauty*]

 

صباح الورد همــوســه ^_^


شايفه كيف متشابهين ؟؟؟

يا بنتي وليه تستحي ؟؟؟؟

عادي اقول انا اخاف من البسس واعشق الحشرات

احد له عندي شي؟؟؟!!!

<< قوية عين

بس ممكن ما اقول اني اخاف من البسس بحاله وحده بس .!!

ايش هيا ؟؟؟

اني اكون جالسه مع جماعه ( اشرار ) يحاولوا يستغلوا ضعفي

ولما اقول ( احاف من البسس ) يجيبوها لياااا ويرمووها عليا


يسعدك ربي يا قمر ^^