[align=justify]
________________________
هيه جات على الرز!!
فتحي حلواني
السلام عليكم ورحمة الله وبركاته وكيف حالكم يا حبايب اهو رجعنالكم ورجعنا للغلب تاني يللا الله يعيننا ويعينكم وصدقوني انه لكم وحشه.... المهم لا اطول عليكم وخلونا في هرجتنا حق اليوم ...... دحين انت جبت المقاضي كلها ونسيت ما تجيب الرز وانا كتبتوا لك في الورقه.. ايش قلتي الرز اصحك تجيبي سيرة الرز تاني هوه انتي ما سمعتي وزير التجارة ايش يقول؟ ...ايش بيقول يا سيدي ؟ بيقول هوه انتو حتقعدوا تاكلوا رز الييين متى طووول عمركم بتاكلوا رز خلاص شوفولكم حاجه تانيه والا اشتروا أي نوع تاني من الارزاز يكون سعره على قدكم وبلاشي تاكلوا من الرز الطيب شفتي كيف حلها الوزير ودبرها على بال معاليه انه نحنا الغلابا طايحيين طيح في الكافيار والاكلات الفرنسيه والايطاليه والمكسيكيه ومو عارف انه نحنا ما عندنا إلا الكبسة والجبنة والشريك عشان كده بقولك اصحك تجيبي سيرة الرز لا وقال كمان( مدوا رجولكم على قد لحافكم) هوه عاد باقي لحاف الهوامير اكلوا الاخضر واليابس في الاسهم وفواتير الهاتف والكهرباء والايجارات ما قصرت جابت خبرنا ونفضت جيوبنا والاسعار اللي كل يوم بتزيد دمرت حياتنا لا وبيقول كمان انه ما يعرف سبب ارتفاع الاسعار (ياعيني) اذا كانت وزارة التجارة ما تعرف سبب ارتفاع الاسعار مييين يعرف يا معالي الوزير عشان كده بقول لمعاليه اللي (يده في المويه مو زي اللي يده في النار) وبعدين هيه جات على الرز يا معالي الوزير الاسعار كلها صارت حريقه الالبان والاجبان والحليب واللحوم والاسماك والدجاج حتى عمدة رمضان (الفول) جاتو العدوى واي شي يخطر في بالك زاد سعره لا المصيبه والللي يفطس من الضحك انه نسمعهم يقولوا انه الرز صار مرتبط بالدولار وبعدين اللي يموتك قهر ويخلي مصارينك تتعروج فييين الموظفيين حقون وزارة التجاره والصناعه مو هما بيقولوا انهم عندهم خدمة استقبال الشكاوي حق المواطنييين وانهم حيسووا اللازم على هادي الشكاوي فييين هادا اللازم اللي نحنا محنا شايفين له لا طريق ولا شارع والا الحكاية كلها تيتي تيتي زي ما رحتي زي ما جيتي ..... وانتو يا تجار الله يكافيكم على اللي قاعدين تسوووه فينا ترى ما حتاخدوا شي معاكم كلها الحكايه حفره ومتر قماش وقطنه وفي رب اسمه الكريم حينصفنا منكم ..... وانت يا وزير التجاره اتمنى انك ما تزعل من كلامي لانه انا ابن البلد وجالس بتكلم مع مسؤول في بلدي وعيشوووا كتييير تشوفوا كتيييير.
__________________
هذا مقال الكاتب العكاظي فتحي حلواني المكنى أبو فتو , وهو يكتب بلهجة ( بيور ) حجازية ,,,
الحقيقة الكلام عن الغلا الأيام هذي يحتاج إلى مواضيع ومواضيع وصفحات وصفحات ,,,
وأنا حبيت إني أبدأ الموضوع بكلام أبو فتو وراح يكون لي تعليق عن الغلاء وأبي مشاركتكم في الموضوع ,,,
من الأشياء الجميلة خبر تظاهر المئات من المواطنين في الأردن وقفلوا طريق المطار في عمان وبعدين فتحوه بس لأجل التظاهر ضد الغلاء ,,, وعارفين المظاهرة ليييييييييه ؟؟؟ لأن علف الأغنام أرتفع سعره !!!
تصوروا عشان الأغنام صارت هالمظاهرة !!!
ياحظ الغنم وياشين حظك يالسعودي !!!
وعلى قولة أبو فتو ,,, عيشششششششششو كتييييييييييير تشوفووووووو كتييييييييييييير
_______________
وللموضوع تكملة [/align]