كان يامكان في قديم الزمان چان فد يوم واحد اسمة زكي ابن ام زكي شنو هذا چان خطيه داگة الفگر والضيم يعني الله مطيح حضة المهم لا اگللگم ولا تگلولي راح احجيلكم القصة مالتة لان قصتة منفلقة حيل .... وهاكم هاي هية القصة الاماية: زكي روح جيبلي دوة لان اليوم حيل دايخة لان السكر عندي هابط زكي : ماما شي عادي السكر يهبط من اكل الفلافل الامايه: ابني غير من الفگر والفلاس يعني قابل شآكل زكي : ماما هاي شبيچ قلة اكل اشو كل الاكل هالايام مال فگر الاماية: هسة دنچب انچب وروح جيب الدوة هاك هاي 1500 وروح يالله زكي : أي مامة طلع زكي بالشارع هوة والفلوس ودايخ بالعيشة وبالاكل مشه بالشارع چا ن فجأتاً شاف مرية عجوز گامز رب ربهة دتريد تعبر الشارع چان يلاحظ بكل حزم انه سيارة طايرة تريد تدعمهة صعدت عندة الحمية وصار حيل نشمي چان يچيت هيچ شطح على التبليط وجرهة خطية وتگردح و طلع منة دم المهم جرهة ونفض هدومهة لان خطية انچبحت من اثر الدفعة والسحبة چان تباوع علية العجوز وكلتلة انتة بما انه شفتك خوش ولد ونشمي راح اساعدك چان يگللهة شلون گلتلة راح ابيعلك شي يسوة ملايين چان يگللهة ملايين لو غزلان هع هع هع هع چان تگلة اثول اثگل شوية هية مال لعب جهال مال تحشيش چان يگللهة العفو خالة بس مو انتي ما اعرف شلونچ چان تگلة ليش عيني شفتني امشي على ايدي لو شنو المهم ما اطول السالفة ..... عليكم.... گلتلة انتة اشگيد شايل چان يگللهة 1500 گلتلة انطينياها واني انطيك الي عندي چان يگلهة هذا الشي الي يسوة ملايين چان تگلة أي.. گلها: والله گلتله: أي والله چان يگول باوع هاي الفيطي شلون دتمرغل بروحهة چان تكفخة وتگلة احترم اثول اني اكبر منك گللهة العفو وسكت فكر جابهة منا وداهة مناك صفن چان يگللها اوكي انطاها الفلوس چان تنطي الچيس وگلتله لتفتحة الة من تريد تزرع الشغلة الي بي وعافهة ورجع للبيت دخل على امة فرحان چان امة كلة هاااا يمة شبيك فرحان جان يگللها ماما اشتريت شي يسوة ملايين چان تگلة راويني چان يطلعلها الچيس فتحتة چان تلگة بي حبات ال فاصولية صفنت الاماية شوية چان تگوم اتصيح ابن القندرة اني مكيفة عندي زمال اعتمد عليّ رايح جايبلي سبع حبات فاصولية ب1500 انت شنو حمار چان يكللها اوكفي بالله خلي نزرعهة يالله تحجين چان يطلع للحديقة واخذ الكرك وحفر چان يحط الحبات وسگاها وفات للبيت نام و شنو كل مشوفة امة تگلة هااااا زوج هاااا قشمر ومن هالحچي المهم گعد الصبح چان يلگي امة امددة بالغرفة راح يگعد بيهة ولچ يوم شبيچ يمعودة لتموتين ومن هالحچي صحت الاماية بس شنو تهذي وتخربط هيچ تگول طويلة وعريضة وما اعرف شنو چان يكول لا يمكن امي لگفت من الصدمة مال البارحة خرة بحضي المهم صحت چان يگللهة شبيچ ماما گلتلة اطلع برة گللها ليش ماما كلتلة اطلع برة هوة شعبالة دينطرد خطية انعقچ وضاج فطلع بالحديقة جان ينصدم شاف فد شجرة شطولهة وين واصلة صفن بالبداية وبعدين گال شنو الي يسوة ملايين بهاي الشجرة فگال يمكن شايله فد شي بالبة مالتهة خلي اصعد فتشلبه وهوة ديصعد على النص مال الربع مالتهة جان يوگع گام وگف صفن چان يروح لبيت جيرانهم چان يگلة عمو عمو فگله هااااااا ابني گلة عمو بما انه انت مگربچي فأريد منك تبلية چان يگلة ليش ابني شتسوي بيها چان يگلة عمو اتفرج عليهة أي قابل شسوي بيها غير اصعد بيهة على الشجرة چان يگلة يالله اخذهة فكلة شكرا عمو ورجع للبيت وحط التبلية وصعد وصعد وصعد وظل يصعد لحد مگام يشوف البيت نقطة يعني ورة الغيم شوف الچذب المهم وصل للنهاية بس شنو هوة گام يفلت من التعب المهم مدر راسة وخر الغيم شوية چان يشوف قصر لا وشنو قصر فوگ الغيم يعني هيچ على اليمنة مال غيم أي صعد مشة على كيفة حتى شنو متطمس رجلة بالغيم لان اذا تطمس ينزل چفي على الارض واني اگول ارض لان شنو هوة بالسمة هسة وهم المهم مشة چان يدخل بالقصر بس شنو يمشي على كيفة بس هسة مو علمود اخاف يطمس بالغيم لا اخاف واحد يلگفة لان ميعرف منو بهالقصر فات يباوع يمنة ويسرة چان يشوف غرفة وبيهة صوت واحد بس شنو مو صوت مال اوادم هيچ صوت خشن يلعب النفس چان يمد راسة هيچ من جوة الباب چان يتفاجىء شنو هاي واحد بگد الثور بس مو ثور لا بشر بس شكله يخوف يا يابة يا يمة المهم بس شنو الي دوخة بحضنة حاط دجاجة ويمة طن مال ذهب لك شنو خيل هواية وهوة الاخ زكي منا مفلس رب مذهب دينة مسموط الاخ گال شنو السالفة منين الة هذا الذهب وهوة بحافات المياه لازم اعرف ظل يباوع چان يشوف الدجاجة گامت تعيط يعني تقاقي بس شنو بصوت عالي مو على كيفهة المهم جان تگوم تبيض بس شنو الي خلى يتخبل گامت تبيض بس البيض يطلع ذهب سبحان الله المهم شگال لازم لازم هاي شنو اللازم بيهة تكرار يعني هيچيعني مال ملحة ظل ينتظر لحد منام هذا البغل الچبير چان يمشي على كيفة وراح على الدجاجة دياخذهة چان تگلة الدجاجة ولك انت شجابك هنا فشنو فز الولد خطية حقة شنو دجاجة تحجي ومو أي حجي وانما ترزل المهم گاللهة اش لحد يسمعنة جان تكله يالله شتريد لتدوخني گللهة اريد اخذچ وياية چان تگلة شنو هالميانة انت شوكت عرفتني حتى تاخذني ترة عيب هالحچي اني بنت عوائل اخوية چان يگللهة اهو گامت تفيك هسة انتي كلچ على بعضچ دجاج قابل منو انجلينة جولي لو منو چان يحط ايدة على حلگهة واخذهة بس شنو الغبي من الخبصة انضرب بالباب من ديطلع لان الباب من هذا الجام وهوة اثول فنلطم بلباب چان يگعد من النوم هذا الرجال الچبير فتح عينة فركهة جان يشوف زكي الاثول وشايل بيدة الدجاجة العينتين زكي رأستا طفر مية بلوفة وهذا الچبير الرجال شنو صار مصرع من السرعة ولا عبالك چبير صار طيارة والله ورا وشنو هذا زكي هو والدجاجة رأسا على الشجرة بس شنو نزل تكردح يعني نزل شطح بلا لا تبلية ولا شي على بطنة واول ما وصل للكاع يعني للارض ركض على المطبخ ديجيب نفط حتى يحرگ الشجرة حتى هذا الرجال ما ينزل اشو من فات للمطبخ يدور نفط ملگة مخلصين وماكو نفط لابالمحطة ولا بطيخ صفن وشنو هاي من هوة صافن هذا الرجال دينزل من الشجرة بس يطول لان شنو تخرب القصة اذا يلحگ بزكي لان القصة تگول ميلحگ بزكي أي المهم زكي صفن مثل ما گلنة چان يروح ركض على السيارة مالتهم وهاااا صدك همة ما عدهم سيارة بس شلون قابل يحرگ الشجرة مترهم أي راح على سيارتهم وسحب بانزين ومنسحب لان سيارتهم كوري يعني فلتر يعني مينسحب منها بانزين وتمدد جوة السيارة المهم سحب البانزين وحطة بالسطلة وراح ركض چان يرش على الشجرة وطلع جداحة من جيبة وشعلهة والصدفة والمفاجئة محترگت الشجرة لان البانزين مو زين صفن زكي همين چان يگول شلون اليوم مراح تخلص هاي القصة الگشرة اني شورطني بهيج سالفة المهم جاب الكرك وظل يحفر ويحفر ويحفر لحد ما طلع فد شي من الگاع لزمة زكي جان يطلع نفط اسود حط منة للشجرة وعلگ الجداحة چان تاخذ الشجرة واحترگت ومات الرجال الچبير وملحگ ينزل ممات من ورة الحرگ لا مات لان القصة تكول مات بس ما اعرف شلون ومرت الايام والدجاجة تبيض وزكي وامة صاروا زناگين كله سيارات وفلوس وچان على غفلة تصير الشاشة سودة وانكتب علية نفط العراق للعراقيين فلا تفرطوا به للأغراب مع شكر وزارة النفط العراقية احمد ظلمة
