هرج جداوي؟
>>1-طيب طيب : و هذي الكلمة تصريف من الدرجة الأولى يعني لمن واحد يكلمك تجي تقولوا طيب طيب الولد يسير وجه نص ريال و ما أ،صح باستخدامها لأنها بصراحة تزعل.
>>2-أبو كلب : وهذه الكلمة تنقال لمن يكون في شي ما يعجبك يعني :
زي لمن يكون جوالك قديم ومعدوم العافيه تقول عليه جوال أبو كلب .
قلمك ما بيكتب زي الأوادم ويقطع تقول قلم أبو كلب وهلما جرا .
>>3-أشكل : جات فتره انتشرت دي الكلمة بصورة كبيرة وهيا بشكل عام معناها
الطناش فلمن تيجي تبغى تطنش شي تقول أديه اشكل ومأخوذة من لعبة البلوت
او الورق للاخوان اللي ما يعرفو معنى البلوت.
>>4-أطبعه : من الألفاظ المضحكة جدا وتنقال لمن شخص ما يسمعك
ويسأل ايش قولت وماتعيد الكلام تاني فتقوله اطبعه بلاهه وربي بلاهه.
>>5- أل : انتشرت بشكل رهيب اضافة ال التعريف من باب المبالغة في الفترة
الاخيرة زي مثلا لمن تشوف واحد غشيم تقول مو بس غشيم الغشيم
لمن شباب يعاكسوا في السوق ويشوفو بنات ما يقولو بنات البنات ما رح
يفهمها الا اهل الحجاز بصراحه لانها تتنطق بطريقة مميزه.
>>6-انبراشة : نعرف انه لمن بتلعب كوره واحد يدخل عليك معانتها انبرش
عليك لكن عند الشباب صار له معنى تاني انبراش صار معناها انه دخله غلط
وسط الكلام يعني انه تكون انته والشلة بتهرجوا في موضوع ويجي واحد
يقول كلام ماله أي علاقة بالموضوع هنا نقول فلان انبرش وهادي تصير
انبراشه ولا لمن يكون الكل ساكت ويجي واحد يقول كلام ماله داعي زي
نكته بايخه مثلا هنا نقول على الحركة دي انبراشه.
>> 7-انننزل : ومعناها لمن واحد يتكلم كلام ومبالغ فيييه بالعربي بكش نقله انننزل .
>>8- بلف : من اضحك المصطلحات بصراحة طبعا الشباب يعرفو
البلوف معنى انه شخص ينبلف يعني ان يسوي الشي بسرعه بدون تفكير مثلا
لو شاف صاحبه اشترى سياره جديده وعجبته قوام جاب وحده من نفس النوع
هنا نقول انه بلف ينبلف بسرعة احس بعض الناس ماحتفهمها بس
هوا معناها كده وخلاص .
>>9- بقش : وهي مرادفة لكلمة ذكرناها قبل وهي أطبعه.
>> 10- تشبيك : ودي الكلمة معروفه وانتشرت بمختلف ارجاء المعمورة ومعناها
انه لمن واحد يقول انا شبكت فلانه يعني انا خليتها تعجب فيا وتحبني بس
بيني وبينكم انا اكرهه الكلمة دي لانه الحب مو بالتشبيك والكلام
الفاضي الحب هوا احساس يطلع من القلب للقلب واذا اتنين حسوا ببعض
فهادا هوا الحب مو انه تشبيك فين احنا يابويا في حلقة السمك ولافين.
>>11- تغريز : كلما يعرف انه لمن السيارة تغرز يعني تغرز في الرمل لكن بين
الشباب المصطلح ده غير يعني لمن انته تيجي وتقول غرزت عند فلانه يعني
وقعت في دباديبها او تقول فلانه غرزت عندي يعني وقعت في
دباديبي ايش بالله الكلام الفاضي دا نجيبلك ونش احسنلك.
>>12- بس يا حمزه : هادي اللفظ اللي المفروض يتلغى من قاموس الشباب بتاتا البتة
لأنه على اسم صحابي جليل وحرام نهين الأسم بالصوره هادي وحمزه هادا
اللفظ معروف حاليا بين مجتمع الشباب بالشخص الركاب يعني الكذاب فلمن
تلاقي احد يبكش يقولوه بس ياحمزه.
>> 13- جنط : الكل يعرف جنوط السيارات طبعا لكن اليومين دول برضو صار
للجنط معنى تاني فلمن انته تيجي تقول انا اديت فلان جنط يعني أنا
طنشته وهيا وأشكل اللي ذكرتها فوق بنفس المعنى كلام اهبل ادري بس مشوا
حالكم
>>14- دافور : دافور معناها زمان في الحجاز الفرن ولكن دحين صار معناها
الولد الشاطر في الدراسة نقوله دافووووور.
>>15- درج : من احلى المصطلحات بصراح وهيا سبه لكن سبة لطيفة يعني لمن
واحد يعمل حركه غبية بدل ما تعطيه من الالفاظ اللي تسم البدن زي
ياحمار وياتور قوله يادرج يعني شي لاهو سبه ولا حاجه منها انه انته
فضيت غضبك ومنها انه ماسبيته ==== > لا ياشيخ .
>>16- دعس : دي الكلمة تنقال للاقدام على الشي وتنفع مرادف لكلمة قدام يعني
لمن مثلا يجي احد يقولك تيجي نروح التحلية ترد عليه وتقول والله دعس
يعني يلا معاك.
>>17- زي الكرتوووون : وتنقال للواحد الأهبل.
>>18- سليتني : لم احد يقوول كلام يطفش أو مالو داعي تقله ترااك سليتني.
>>19- شاكوش : معناها الاصلي طبعا المطرقة لكن دحين صار معناها الولد
اللي مو حلو نقول عنه شاكوش.
>>20 - شباب في رحلة : وهيا مرادف لكلمة مشى حالك اللي أستخدمتها كتير
في كلامي فلمن تعمل شي وما يطلع مره مزبوط فتقول للي جنبك يااخي عادي
شباب في رحلة هههههههههه من فين جات هادي الله اعلم.
>>21 - شوربة : طبعا كلنا نعرف الشوربة وخصوصا اننا انشالله صايمين
احلى شي عندنا هنا شوربة الحب على الفطور ياسلام سلم لكن هنا معناها
غير فلمن انته تقول شوربه يعني شي سهل فلمن مثلا يكون عندك اختبار
ويكون سهل جدا تقول الاختبار كان شوربة وهكذا.
>>22- صاروخ : طبعا نعرف الصواريخ لكن هنا معناها شي ثاني
معناها البنت الحلوة فلمن تشوف بنت حلوة نقول عنها صاروخ.
>>23 - صهيوني : كلمة جدا وحشه بصراحه وما احب انه نستخدمها وهي تنقال
للشي الحلو فيقولو لو شي جدا جميل صهيوني وهي مو حلوه لانه الصهاينة
اليهود مو من الجميل ننسب لهم الحاجات الحلوه.
>>24 - طاسة : طاسة هادي بمعنى دماغ وطبعا تختلف عن طاسات السيارات بس
كانه ادمغتنا صارت كفر الله المستعان اجل ايه قلوبنا
دحين محرك السياره ولا ايه ياناس كلام مدري من فين جبناه فلمن انته
تكون تعبان مثلا تقول بروح انا واعدل الطاسة طيب لا تنسي يابن الحلال
تربط حزام الأمان معاك .
>>25- طقطقة : ودي الكلمة تنقال لمن تبغى تتسلي في واحد يعني تستعبط عليه
وهوا اهبل يكون مسكين على نياته وتلاقي ياما شباب مثلا متجمعين يقولو
لو جا فلان نطقطق عليه ولا تلاقي واحد يجي يقول امس طقطفنا على راس
فلان وزي كده.
>>26 - في الألف وفي المليون : دي حلوه مره وهيا لمن تشوف شي يعجبك
ويكون مميز مافي زي يعني او تعمل حركه مميزه او شي زي كده لنفرض مثلا
جوال عجبك تقول والله جوال في الألف أو تقول جوال في المليون.
>>27 - ما عندك احد : وتنقال للشي اللي مو تمام .
>>28 - نمرة واستمارة : ودي تنقال عند التأكيد وغالبا في الغباء
والهباله زي مثلا تقول فلان أهبل بنمرة واستمارة.
>>29- كاي : وهادي هيا ضحكة الشباب الجديدة ويضحكوها وقت الترقية وانا
اكرهها جداجداجدا لاني ما اعتبرها ضحك اعتبرها هبل فيها ايش لمن نضحك
زي الأوادم لا دحين صار الضحك تقول كااااااي بصوت عالي وتمد الألف.
>>30 - هبقة : هبقة زمان اعتقد كان معناها سرقة لكن دحين اتغير المعنى
فلمن تقول مثلا والله هبقت انا والشباب ورحنا ثول مثلا فهبقة فهنا
معناها طلعة وليها معنى تاني بمعنى هروب زي لمن طالب يقول أمس هبقت من
المدرسة يعني شردت منها.
>>31- يعطيك : دي الكلمة من الكلمات الجديدة وتنقال للتشجيع يعني لمن
تلاقي احد عامل حاجه رهيبه تقوله يعطيييييييييك بمد الياء التانية زي
مثلا يكون سجل قول ولا شي زي كده.
و اللي عندو كلام تاني يزود.
اصلا كل شي عند أهلي شباب في رحله... يعني الذكريات بالهبل...
<<وحده قوووووووويه..
