مساء النرجس والليلك للجميع
.
.
.
شهر تقريباً ووالدتي وأختي بيدورولي على عروسة
تخيلوا شهر
كأن البنات خلّصوا
قبل الشهر دا كانت العيلة كلها بتدعي الليل والنهار إني أوافق على فكرة الزواج
مجرد أعطيهم الأوكي .. وأنا كنت ممانع بشدة الفكرة
لأسباب كثيرة مو مجالها الآن
وأول ما قلت (سووا زي ما تبغوا )
انقلبت الدنيا :rolleyes:
تقولوا اني حلّيت أزمة العراق
التلفونات ترن على مدرا الـ24 ساعة
كلّه يبغى يجوز هائل
واجتماعات ثنائية مغلقة بين أمي وأبوية
واجتماعات ثلاثية بين امي وأختي وأبوية
والجلسة المفتوحة اللي كنت أنا فيها كانت استجواب
كان الإستجواب يشبه استجوابات المعتقلات
خلّيني أقلكم على اللي صار
أمي :
قلّي المواصفات اللي تبغاها؟؟
(كأنها سيارة)
أنا:
بنت ستايل - بيضه او سمرة مش مهم - حلوة يعني لازم تكون حلوة
يعني تخليني أطالع فيها ما أطالع فغيرها - تكون نحيفة وقوامها ممشوق
متربية وبنت ناس - دمّها خفيف مش مستخفة دمّها على طول يعني-
دلّوعة - متدينة بس مش معقدة - ست بيت .
طبعاً إلى الآن مواصفات عادية لأي ولد يبفكّر في فتاة أحلامه
خصوصاً لو ولد صايع زيي ومن كثر ماشاف صار انتقائي أكثر من اللازم::*
المهم يا سادة يا كرام ويا شباب ويا صبايا
مر أول يومين دون أي وضع يبشر بالخير .. ولا على قد الإصرار اللي اهلي
كانوا مسوينة أوّل
المهم جاتني أمي في اليوم الثالث وسألتني
أمي:
في مشكلة إذا كانت تشتغل؟
أنا:
يعتمد يا أمي بتشتغل فين وليش
أمّي:
طيب عندك مانع إنها تشتغل بعد الزواج؟؟
أنا:
يا أمّي أول سنة سنتين طبعاً تنسى موضوع الشغل دا لغاية ما تستقر
أوضاعنا وبعد كده لو حتشتغل فمكان مافيه اختلاط وحتقدر توفّق بين
البيت وعملها ما عندي مشكلة .. وإذا لقيت أي تقصير حتسيب الشغل
سابتني أمّي كمان 3 أيام ورجعت
وسألتني
أمي:
عندك مانع تكمّل تعليمها؟؟
أنا:
أيش البنات اللي بيتلككوا دول
لا طبعاً ما عندي مانع
بس ايش تعليمها؟؟
أمّي:
يعني لو تبغى تكمّل جامعة في المستقبل
أو تبغي تحضّر ماجستير أو دكتوراه
أنا:
يا أمي إنتي من جدّك ؟؟؟؟؟ :-S
يعني أنا ثانوي ومنتسب والله العالم بكمّل ولا لأ
تجيني وحده بدكتوراه .. أنا حرام فيها والله
وبعدين بالله يا أمي أنا عمري 24 سنة يعني وحده تبغى تحضّر جن كم حيكون عمرها...؟؟؟
المهم يا جماعة انتهى الأسبوع الأول
ومع بداية الأسبوع التاني
انفلتوا الناس
22 بنت يا جماعة إلى الآن أهلي كلموا أهاليهم ومافي ولا وحده تنفع
أحد يصدّق؟؟؟؟
حتسألوني ليش
أقلكم الأسباب
1- كل المواصفات فيها بس متينة
2- كل المواصفات فيها بس وحشة
3- كل المواصفات فيها بس لازم تشتغل
4- كل المواصفات فيها بس ما تعرف تسلق بيضة
5- كل المواصفات فيها بس مطلقه
6- كل المواصفات فيها بس صغيره أو كبيرة
7- كل المواصفات فيها بس ابوها ما يجوز إلا من العيلة
8- كل المواصفات فيها بس الأم تبغاها تسكن معاها فنفس العمارة أو قريبة منها
9- كل المواصفات فيها بس دكتورة
10 كل المواصفات فيها بس الاستخارة ما طلعت طيبة
11- كل المواصفات فيها بس تبغى مهندس أو دكتور
12- كل المواصفات فيها بس عيلة فرررييييييييييييييييييي
13- كل المواصفات فيها بس ماتعرف تغسّل ولا تكوي
تصدقّوا عاد أنا جاني إحباط:-S
شهر ومش قادر ألقى بنت الحلال إللي فيها المواصفات اللي ابغاها من غير
تعقيدات من أهلي أو من أهلها
حاسس بأني حعنّس
المشكلة الواحد لما يمشي في السوق يشوف بنات زي القمر
ويسأل نفسه أهالينا لما يجيوا يخطبوا ما بيجيبوا شي زي كده ليه؟؟
وهنا حابب أطرح سؤال
علاقات الناس خفّت ببعض ولا بنات زمان خلّصوا وتربية بنات البلد
طرأ عليها بعض التغيير؟؟؟؟
لكم خالص التحية،،،،