[align=center]
السلام عليكم ورحمة الله وبركاته
مساكم / صبحكم الله بـ الخير جميعـاً
هـ الموضوع صار لي فترهـ وانا ازبط فيه وأخيراً تم التنفيذ
هو عبارهـ عن تقرير مصور لـ رحلتي إلى مملـكـة تـايـلانـد
وان شاءالله تستمتعون فيها
اليوم الحجز كان على جزيرة ساموي وهذي صور للجزيره من الطايره
كان الوصول إلى جزيرة ساموي الصبح .. شوفوا الجو كيف
ولايفوتكم مدرج المطار والخضرهـ والشجر والطبيعه
موب مطاراتنا ياربي لك الحمد .. ماغير بر وحر وغبارن يشق الوجه
وبما انها جزيرة .. فـ من الطبيعي يكون كل شي فيها بدائي وصغير
وشي متوقع تكون الشوارع صغيرهـ وسيد واحد واغلب الناس يمشون بـ دبابات
بس اللي ماتخيلناهـ .. المطار حقهم .. بصراحه كان أكثر من روووووعه
ماراح تصدقون لو قلتلكم المطار كان عبارهـ عن ...
" عشـّـه " !!
<< كوخ لـ غير الناطقين بـ اللهجه النجديه
من جد المطار كان كوخ من الخشب وأعمدته جذوع أشجار جوز الهند
وكل شي في المطار تقريباً مصنوع من الخشب
" ماعدا طبعا اجهزة الكشف وجهاز سير العفش " !!
هو صحيح المطار بدائي وتحسون انه مصنوع يدوي
ومساحته صغيرهـ جداً بـ اعتبار انه مطار
بس صاير تحفه فنيه وماودك تطلع منه
بصراحه اللي مسويه موب سهل ابدددد
عرف كيف يستغل الخشب اللي هو مصدر رزقهم " بحكم كثرة اشجار جوز الهند في الجزيرة "
وبنفس الوقت عرف كيف يجذب السياح للـ جزيرة ويكون المطار
هو أول معلم سياحي فيها !!
شوفوا حتى الباصات تحسون انها استهبال
مو باصات مطار تقول حديقة حيوانات والا ملاهي
بالله هذي لوحة مطار اجل .. بقاله مو مطار
ماقلت لكم هـ المطار منسسسسسم
يعني لـ درجة ماهو صغير .. تشوف كل شي قدامك
نقل العفش والطيارات والباصات وكاونترات التذاكر .... الخ
ولاتفوتكم طريقة نقل العفش والشنط من الطيارة للـ مطار
المطار من داخل
صالة انتظار الرحلات << اصلا المطار كلله ثلاث صالات قصدي ثلاث اكواخ
ولاحظوا الكراسي كللللها خشب
انا يوم شفت المطار كذا .. قلت الله يستر لايصير الفندق عشه بعد !!
بس اشوا يوم وصلنا الفندق واثرهـ مبنى فخم وحلوو وفيه مسبح بعد << لاياشيخ
ترى ماطبينا فيه اول ماوصلنا
بما اننا واصلين الصبح (( الساعه 10 تقريباً )) .. وقدامنا اليوم كامل
أخذنا رحلة يعتبرونها نص يوم ..
اربع ساعات من 1 الظهر إلى الساعه 5 العصر .. وتشمل :
عرض قرود + رحلة في الغابات على ظهر الفيل + زيارة حديقة السحر
ركبنا الددسن وطلعنا
كان أول شي عرض القرود .. طبعاً حنا مااااااالين منهن بـ الطايف
موب زي الاوربيين اللي تجمعوا عند القرد وكل واحد يبي يصور معه
عشان كذا ماصورت القرود ولا عرضهم البايخ
اجل قرد يتسلق الشجرة ويفر حبة جوز الهند بـ يدينه الين يفكها
بعدين يرميها على الرجال اللي واقف له تحت !!
المهم .. بعدها خلونا نذوق طعم جوز الهند الطااازج << ياربي لك الحمد .. بغيت اجيب العيد بس الله ستر
بعدها رحنا للـ غابات وركبنا الفيل واخذ فينا لفّـه << وين باص
لا اخذ فينا جولة وسط الغابات
ترى الفيل مو صغير .. بس هذي اللقطه جايه من فوق
حنا واقفين في مكان مرتفع عشان نكون موازيين لـ ظهر الفيل ونقدر نركب
وهذي الشلالات وسط الغابه
تابع[/align]