كبسة الرز بالتونه .. تخليك تأكل اصابعك من الندم
يسعد أيامكم جميعاً بالبصل والثوم <-- (على بالي عرفت أخش جو معكم)
الليله يا أحبائي التشيفات والتشيفين عندنا طبخه روعه <-- (بكل ماتعنيه الكلمه)
طبقنا اليوم هو : " كبسة التونه " !!
هذا كان طبقي المفضل أيام كنت في " المنفى "
(طبقي المفضل في سهولة الطبخ ولا أعني بأي حال من الأحوال أكلتي المفضله)
المقادير :
1- علبة تونه ( يمكنك الحصول عليها من أي بقاله قريبه من بيتك )
2- كيس رز أونكل بنز ( بنز ضمان الجفالي وكاله )
3- حبة مرقة الدجاج ماجي ( ماجي ! مايبيلها شرح )
4- قدر ( قابل للتضحيه في حالة الحرق )
5- ملعقه ( خاشوقه باللهجه المغربيه )
6- فرن ( فرن )
بإسم الله نبدأ الكبس ..
تحط القدر (الفقره الرابعه من بند المقادير ) فيه مويه إلى الربع فوق الفرن وتشب النار .. وبعدين تكب الرز في القدر .. وتطالع الرز إلين يبدأ يشرب المويه .. وبعدين تحط حبة الماجي في القدر وتقعد تحرك الرز وفيه حبة الماجي إلين تختفي (سم بإسم الله) .. وبعدين تشوف الرز شرب المويه كلها (عليه بالعافيه) تقوم تفتح علبة التونه وتكبها على الرز .. وتقعد تحرك إلين يتختلط الرز بالتونه .. ويطلع شكله من بعيد رز برياني (من بعيد) ذاك الوقت تقدر تحطه على جنب وتطلب لنفسك واحد بيتزا على السريع
تمنياتي لكم بوجبه هنيه تكفي ميه
وأي إستفسار حول أرقام محلات البيتزا أنا حاضر
